تهريج وقله ادب

افتكر ان اغلب الناس عرفت انا فى الموضوع ده هتكلم على ايه ؟؟ طبعاً هتكلم على الحشيش وعلى الدماغ وعلى قله الادب والسفاله اللى موجوده سواء داخل حرم الكليه المحترمه او خارجها

طبعاً فيه ناس كتير مش على هواها الكلام اللى هيقروه دلوقتى بس اعمل ايه بقه انا دماغى جزمه وبعليها عليكم زى ما انتم قرفينا وبتعلوا دماغكم على حسابنا ... طبعاً بقه منظر طبيعى جداً انك وانت داخل الكليه تلاقى مجموعه شباب كده وخدين ركن بعيد هادى وملمومين فى اى عربيه بره الكليه بيحششوا ولا هنروح بعيد ليه لو انت نظرك ضعيف حتى وعايز تشوفهم بص بس فى لمحه كده على الطريق الرئيسى اللى قدام الكليه هتلاقى محطه اتوبيس مكتوب عليها محطه اتوبيسات اكاديميه الكينج مريوط هتلاقى تحتها او وراها كام شاب من الحلوين بتوع الايام دى اللى بيتبدل الـ 3 منهم براجل متجمعين عن المحطه الجميله دى اللى المفروض الكليه بنياها موقف خاص للميكروبصات

بتاعتها ومش بتستخدمها طبعاً هتلاقيهم بيحششوا بصراحه اخر وساخه وقله ادب طبعاً بعد مابيدخلوا الكليه تهييس وضحك مبالغ فيه وهزار دمه تقيل ولا احترام لبنات واقفه ولا احترام لحرم جامعه ولا اى حاجه،، كله عايش فى ميه البطيخ

واللى انا هتكلم عليه المره دى مش حبت الشباب التافهين دول لأ انا هتكلم على حاجه اهم بكتير اوووى هتكلم على الميكروبصات اللى بتنقل الطلبه كل يوم من بيوتهم لحد الكليه ،،، شوف فى كام اتوبيس كل يوم وبينقل كام طالب

هتلاقى وانت قاعد فى امان الله كده حبه شباب واخدين اخر كراسى فى الاتوبيس وبرضه بيحششوا كده عينى عينك والريحه فى الاتوبيس

طبعاً زى الزفت والاهم من كده وكده ان السواق كمان بيحشش ، وبيلف سجاير ملغمه بهباب حشيش وبانجو وقرف وسايق وبين ايديه ارواح ناس والمصيبه ان بيكون فيه بنات قاعده كتير بس هيعملوا ايه يعنى هينزلوا فى نص الطريق مثلاً وتبقى مصيبه كمان لو حد من اللى قاعدين مش عجبه اللى بيحصل يبقى نهاره اسود اتفرجوا بقه على الخناق جوه الاتوبيس والخناقه تكبر واول مايوصل الاتوبيس الكليه يتخانقوا مع الغلبان اللى مش عجبه ده ويلموا اصحابهم وتبقى مصيبه ،،، طبعاً هتقولولى ياعم الحاج انت بتفتى وماوصلتش للدرجادى انت بتبالغ

هقولكم طيب انا عندى دليل زى الصور الحلوه اللى على البلوج دى بس مش صور بقه ده فيديو زى الفل هيثبتلكم كلامى

هتلاقوه فى الاخر وكمان هتلاقوا لينك للفيديو ممكن تتفرجوا عليه لو الفيديو مش شغال والمهم بقه فين اداره الكليه بتعمل ايه واتصرفت ازاى فى كم الشكاوى اللى وصلت للاداره بتقول الحقونا يا جماعه ؟؟؟

يعنى هتتحرك امتى لما اتوبيس يتقلب مثلاً وفيه 40 ولا 50 طالب يروحوا فى داهيه للدرجادى وصلت السلبيه واللامبالاه من اداره الجامعه المحترمه ،،، ياجماعه يا اداره يامحترمه اغيثوا الطلاب وعلى وجه الاخص البنات الغلابه دى من شبح الاهمال والسفاله والاستهتار

وقله الادب اللى بتحصل عينى عينكم وانا حذرتكم ونبهت وقولت واتنبح صوتى

الحقوا اتصرفوا قبل ماتحصل مصيبه يكون عواقبها كبيره وحسبنا الله ونعم الوكيل فى كل واحد مسئول عن السفاله والتهريج اللى بيحصل ده

وفى كل إدارى لا يرى لا يسمع لا يتكلم.

لينك للفيديو الحقوا اتفرجوا <<

http://www.metacafe.com/watch/1134691//

Yalla_efdah@yahoo.com

فضائح الامتحانات

تصغير مستندات بأحدث الماكينات (كان لابد من تغيير كلمه تصوير الى تصغير)ا
تم التقاط هذه الصوره من داخل حرم الجامعه المحترمه ايام امتحانات الفصل الدراسى الاول
هذا الكشك يخدم طلاب الجامعه بتصوير المستندات والمحاضرات لهم ولكن أيام الامتحانات يكون هذا المكان خير معين للطالب حيث يقوم بتصغير ورق المواد التى سوف يقوم الطلاب بأمتحانها
وجميع العاملين بالجامعه بدايه من رئيس مجلس الاداره و الاساتذه الى اصغر عامل بالجامعه على علم بأن هذا المكان يقوم بتصغير المواد للطلبه ولاشك لدى ان هذا الكشك الصغير تابع لإداره الجامعه لانه يسير على منوالها وسياستها حيث يقوم بتصغير الورقه الواحده للطلبه بـ 25 قرش بعد تطبيق سياسه الاحتكار التى تبنتها منذ السنه الاولى ،،،فقد قامت الجامعه منذ السنه الاولى بتسهيل الغش الجماعى والفردى بـ لجان الامتحانات لتجذب اكبر عدد من الطلبه الراغبين فى النجاح بدون ادنى تعب او جهد ليس معنى كلامى انه لا يوجد طلاب على قدر من المسئوليه والاجتهاد ولكن الغالبيه العظمى منهم ليست لديهم القدره على النجاح بأى من المواد التى تم الامتحان بها واتحدى اى شخص يقول غير ذلك ،،، اسأل اى طالب بعد الامتحان كيف كانت اجابتك لهذا السؤال او اى من الاسئله كان صعب ام كان من داخل المنهج او من خارجه !!!؟؟؟ بلاشك انه لن يجيب لانه لا يعرف محتوى الماده وامام عينى رأيت طلاب تتسائل قبل توزيع ورقه الاسئله فى اى المواد سوف يكون الامتحان
الى هذه الدرجه وصلت اللامبالاه وعدم المسئوليه من الطلاب او من الاساتذه المحترمين
فإذا سألت طالب لماذا ؟. سوف يكون الرد مقنع وسريع "هوه فيه حد يلاقى دلع ومايدلعش او " فكك ياعم هوه انت هتعمل ايه بالشهاده " ياعم انت فاكر ان الشهاده هتجبلك فلوس او هتأكلك عيش ياعم فلوس فى البلد دى ياتتجوزها ياتورثها يا تسرقها " وهذا هو فكر الاغلبيه العظمى منهم من النادر جداً ان تجد طالب له فكر مستقل ينير به من حوله واصبح من المستحيل ان تجد طالب يقرأ محتوى المواد لكى يتثقف ويزيد من معلوماته العامه اذا سألت طالب بهذه الجامعه من هو مجدى مهنا ، الابراشى -ابراهيم عيسى – حسنين هيكل وغيرهم سوف يرد عليك بأستغراب شديد "مين ده" فـ الى هذه الدرجه من الجهل وصلنا
منذ الصغر تعلمنا المثل القائل " قم للمعلم "تعلمنا ان نقدر ونحترم كل من يعلمنا ويدرس لنا تعلمنا ان نتعلم منهم ونتشاور معهم ونستفيد ولكن للاسف فى هذه الجامعه لا تجد من الاساتذه من يستحق التحيه والتقدير سوى القليل منهم للاسف للاسف للاسف
" لك ان تتخيل ان دكتور فى قسم من الاقسام يشرح للطلبه "النت ورك
ويخبرهم بأنه يمكن عمل شبكه ربط بين القاهره والاسكندريه عن طريق النت ورك بين الاجهزه فى المحافظتين وليس عن طريق شبكه الانترنت
دكتور اخر من المفترض انه متخصص فى مجاله ومتطلع سأله طالب اذا كان على علم او لديه خلفيه عن البلوغز او المدونات ليعرف المزيد ولك ان تتخيل رد الاستاذ الرائع بكلمه لا وتغيره للموضوع بسرعه لكى لا يحرج نفسه ،، وليس هذا هو المثال الوحيد بهذه الجامعه لا بل هناك المزيد من الذين لا يحتذى بهم
فهؤلاء الاساتذه يدرسون للحصول على الاموال من الجامعه ليس الا ، وكأنهم اساتذه مؤجرين ،،،اما بـ لجان الامتحانات تكون الكارثه اذا كان هناك مراقب يخاف الله ولا يرضى بتطبيق مثل لا ارى لا اسمع لا اتكلم ,, فتكون الكارثه ينال وابل من الشتائم والمشاده بينه وبين الطلاب وعلى الوفر يكون رد الفعل من الاستاذ رئيس القسم بعمل مسرحيه كوميديه فيدخل الى اللجنه وهو ثائر ويصرخ بأعلى صوت سوف اقوم بتصحيح الماده بنفسى لاى طالب لا يلتزم بالتعليمات وعلى الوفر يهدىء الطلبه قليلاً ويقوم الاخر بالخروج مع المراقب خارج باب المدرج ويدخل الاخير هادىء جداً لا يتكلم وكأن رئيس اللجنه هدده بالقتل ...ا
ومن الممكن ان تجد عميد احدى الاقسام اثناء المرور على اللجان يرى ورقه غش مع احد الطلبه وتسمع مساومه الطالب معه على ان يعطيه ورقه اخرى ليس بها اجابه اى من الاسئله الموجوده بورقه الامتحان الخ الخ الخ
نداء الى وزير التعليم العالى والى كل مسئول عن ابناء هذا الوطن الحبيب
لكل منا وجه نظر ولكل منا حريه التعبير والمجال فتوح امامكم لعرض السلبيات والايجابيات والمشاركه معنا فى حوار مفتوح والتعليق تحت كل مقال وسوف نقوم بنشر كل مايصلنا منكم من اراء وافكار ومشاركات سواء كانت مؤيده لنا ام معارضه فنحن نأمل فى التغيير والوصول الى الأفضل
yalla_efdah@yahoo.com

اكاديميه الكينج

معهد الكينج هل هو مؤسسه تعليميه ام مجرد وسيله لجنى الاموال ؟
your career (desrves) a place like this ...!??
www.kinginstitutes.edu.eg
الرابط المدون فى الاعلى هو الموقع الرسمى لمعهد الكينج
اول شىء ستلاحظه عند دخولك على هذا الموقع الشعار المدون اعلى الرابط
Your Career (desrves) a place like this
لا اعرف كيف لم تلاحظ اداره المعهد كل هذه الفتره ان هناك خطأ لغوى فى الكلمه المدونه بين القوسين !!!؟؟؟
اقترح على اداره المعهد تغيير هذا الشعار الى
you have to thank god that you're not in a place like this ....!
ستلاحظ عند دخولك على هذا الموقع انه فقير جداً يفتقد الاحترافيه
والمصداقيه فى نقل الصور الواقعيه عن اكاديميه الكينج مريوط
ستجد ان الرابط لتسجيل دخول الطلبه بالمنتدى لا يعمل
ستجد عند دخولك على المنتدى انه ليس الا مكان مهجور لا يدون فيه الا الاشخاص المفوضين من قبل الاداره الخ الخ
وسأتركك عزيزى القارىء لتكتشف بنفسك باقى السلبيات – والايجابيات ان وجدت
هناك بعض الصور من الالبوم الموجود بـ موقع المعهد منافيه تماماً للواقع
وسأعرضها عليكم فيما بعد مع عرض الصور الواقعيه المأخوذه من داخل المعهد للمقارنه ليس الا (يمكنك الضغط على الصور للتكبير ) ا!!ا
فى البدايه قبل الدخول فى اى تفاصيل احب ان اشكر كل من ساهم فى هذا العمل الذى يعرض الحقيقه ويفضح كل مستور
اشكر كل الطلاب التى ساهمت فى هذه المدونه واعتذر لكل الطلاب التى لم ترحب بهذه الفكره لاعتقادهم بأن اداره المعهد سوف تقوم بتشديد المراقبه عليهم اثناء الامتحانات القادمه مما يجعلهم عرضه للإخفاق فى الامتحانات
لكل منا وجه نظر ولكل منا حريه التعبير والمجال فتوح امامكم لعرض السلبيات والايجابيات والمشاركه معنا فى حوار مفتوح والتعليق تحت كل مقال وسوف نقوم بنشر كل مايصلنا منكم من اراء وافكار ومشاركات سواء كانت مؤيده لنا ام معارضه
فنحن نأمل فى التغيير والوصول الى الأفضل
yalla_efdah@yahoo.com